Бо ибтикори Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ҳар хонадони тоҷик тақдим шудани «Шоҳнома»-и безаволи Абулқосими Фирдавсӣ ба истиқболи 35-солагии Истиқлоли давлатии Тоҷикистон рӯйдоди муҳимми таърихию фарҳангӣ гардид, ки дар тақвияти ҳисси ватанпарварию ифтихори миллӣ нақши барҷаста хоҳад гузошт. «Шоҳнома» яке аз мондагортарину бузургтарин шоҳкориҳо дар дунёи адаб буда, ҳамчун таблиғгару саногӯи далерию шуҷоат, меҳнатдӯстию сарафрозӣ, хираду маърифат ва дӯстию рафоқат эътироф шудааст. Ин асари боҳашамату пурмаънӣ сужаи бовусъат, образҳои зиёд ва манзараҳои фаровонро фаро гирифтаасту ба қисматҳои зиёде тақсим мешавад ва ҳар як қисмат иртибот ба саргузашти печидаю пурҳаводис ва ҳикматбори ниёгони барумандамон дорад. Дар бораи «Шоҳнома»-и Фирдавсӣ ва сохтору мазмуну муҳтавои он, хушбахтона, ҳам дар Тоҷикистон ва ҳам хориҷ аз кишвар асарҳои зиёде офарида шудаанд. Шоистаи тазаккур аст, ки бисёре аз муҳаққиқон ба масъалаи инъикоси симои зан дар ин шоҳкори адабӣ таваҷҷуҳ зоҳир намудаанд. Воқеан, симои зан дар ҳеҷ як асари адабиёти классикиамон чун дар «Шоҳнома» ин қадар равшану барҷаста ва бо эҳтирому эътиқод офарида нашудааст. Нигоштаҳои шоири бузург нисбат ба зан хеле самимонаанд ва омезиш бо меҳру муҳаббат ва бовару эътимод доранд. Образи зан дар «Шоҳнома» як офаридаи оҷизу нотавон ва дорои фаъолияти маҳдуд будани занро, ки мутаассифона, иддае чунин назару мафкура доранд, қотеона рад мекунад. Дар асари мондагори Фирдавсӣ зан намоди шуҷоату далерӣ, донишу хирад ва чорасозию суханварист. Шоири тавоно нисбат ба зан ҳатто чунин қазоват мекунад, ки хеле муассир аст:
омӯзгори гимназияи хусусии «Тоҷикистон» дар шаҳри Душанбе
