Насриддин Охунзода
Котиби масъул
225-81-55
Саида НАБИЗОДА
Муҳаррири шуъба
225-82-23
Набизода Саида Фазл 13 декабри соли 1966 дар ноҳияи Мир Сайид Алии Ҳамадонӣ (собиқ Москва) дар оилаи омӯзгор таваллуд шудааст. Солҳои 1974-1984 дар мактаби миёнаи №16 – и ноҳияи Ҳамадонӣ таҳсил карда, факултаи забон ва адабиёти тоҷики ДДОК ба номи А.Рӯдакиро соли 1988 ба итмом расонид.
Фаъолияти меҳнатиаш асосан ба се қисм ҷудо мешавад: омӯзгорӣ, рӯзноманигорӣ ва илмӣ. Баъди хатми донишкада дар мактаби миёнаи №1-и ноҳия, аз соли 1996 то соли 2003 дар мактаби миёнаи рақами 16 чун омӯзгори ихтисосманд фаъолият кард. Соли 2002 дар озмуни ҷумҳуриявии «Муаллими сол» шарафи омӯзгорони вилояти Хатлонро ҳимоя намуд. Соли 2003 тибқи як лоиҳа дар ташкилоти башардӯстонаи «Миссияи Шарқ» фаъолият кард. Аз моҳи январи соли 2005 дар ҳафтаномаи «Омӯзгор» ба ҳайси муҳаррири шуъбаи мактабҳо, аз соли 2011 то 2019 дар маҷаллаи «Маърифати омӯзгор» ба ҳайси сармуҳаррир ва аз феврали соли 2019 инҷониб дар маҷаллаи «Маорифи Тоҷикистон» ба ҳайси сармуҳаррир фаъолият дорад.
Иштирокдори даври ҷумҳуриявии озмуни «Муаллими сол» (2002) буда, аз соли 2006 узви Иттифоқи журналистони Тоҷикистон ҳаст, солҳои 2005-2008 дар гурӯҳи коршиносони Вазорати маориф ва илм (таълифу таҳияи барномаву китобҳои дарсӣ), соли 2008 дар ҳайати таҳририяи маҷаллаи «Мактаб ва ҷомеа» фаъолият карда, дар ташкили маҷаллаи «Маорифи Душанбе» аз соли 2019 нақши асосӣ дорад.
Муаллифи бештар аз 200 мақолаву гузориш, мусоҳиба ва лавҳа, созмондеҳи суҳбатҳои ихтисосӣ, баҳсҳои илмиву таълимӣ, конфронс, мизҳои мудаввар, сомонаи нашрияҳои соҳавӣ. Дар давоми фаъолият маҷаллаи «Маърифати омӯзгор» соҳиби рақами силсилавии стандарти байналмилалӣ – ISSN (2306-4293), сомонаи махсус ва саҳифаи иҷтимоии худ гардид. Имрӯз маҷаллаи «Маорифи Тоҷикистон» ҳам соҳиби сомона ва саҳифаи гурӯҳӣ дар шабакаи иҷтимоии Фейсбук гардидааст, узви ҳайати мушовараи маҷаллаи “Маорифи Душанбе” мебошад.
Дар мавзӯи проблемавии «Асосҳои назариявии ташаккули маданияти нутқи хонандагон дар дарсҳои забони тоҷикии синфи 8-и муассисаҳои таҳсилоти миёнаи умумӣ» таҳқиқоти илмӣ дорад, муаллифи китоби дарсӣ ва дастурҳои методӣ, муҳаррири китобҳои илмиву дарсист. Муаллифи китоби дарсии «Забони тоҷикӣ» барои синфи 5, чор нашр; 5 Раҳнамои таълимӣ барои омӯзгорони забони тоҷикӣ; муҳаррир, мураттиб, мусаҳҳеҳ, муқарризи чандин китоби дарсиву дастурҳои методиву таълимӣ аст. Инчунин, дар таълифи Дастури методӣ барои таълими фанни забони модарӣ (синфи 5), «Замимаи китоби дарсӣ» (барои синфҳои 5,6,7,8,10), таҳия ва таҳрири китобчаи «Байтбарак», якчанд китоби дарсӣ, бадеӣ, илмӣ-методӣ, аз ҷумла, таҳриру тасҳеҳи китобҳои «Алифбо», «Асосҳои иқтисодиёт» (синфи 11), «Маърифати молиявӣ» ва чандин дастури методӣ саҳм дорад; соли 2016 маҷмӯаи мақолаҳояш бо номи «Пайкори афкор» дар ҳаҷми 320 саҳ. бо тамғаи нашриёти «Адиб» ба дасти хонандагон расид. Меҳнаташ бо Ифтихорномаи Вазорати маорифи Тоҷикистон (с.2002, 2009, 2018), Ифтихорномаи Иттифоқи журналистони ҷумҳурӣ (2016, 2017,2018), нишонҳои «Аълочии маорифи Тоҷикистон» (2002), «Аълочии фарҳанги ҶТ» (2007), «Аълочии матбуоти ҷумҳурӣ» (2018), медали «Хизмати шоиста» (2018) ва «100-солагии матбуоти тоҷик» (2018) қадр ёфтааст.
Соҳиби ду фарзанд аст.
Шодӣ РАҶАБЗОД
Муҳаррири шуъбаи муасссисаҳои таҳсилоти миёнаи умумӣ
225-81-55
20 июли соли 1964 дар деҳаи Моинкаҷи Ҷамоати деҳоти Роҳатии ноҳияи Рӯдакӣ таваллуд шудааст. Мактаби миёнаи деҳаро соли 1981 хатм намуда, худи ҳамон сол ба факултаи филологияи тоҷики Донишгоҳи миллии Тоҷикистон (қаблан УДТ ба номи В.И.Ленин) дохил гардида, онро соли 1986 ба поён расондааст. Солҳои 1986-1990 омӯзгори мактаби №98-и ноҳияи Рӯдакӣ буд.
Соли 1990 ба сифати афсари тарҷумон дар сафи Неруҳои Мусаллаҳи Иттиҳоди Шӯравӣ хидмат кардааст. Аз соли 1992 то 2000 ҳамчун омӯзгор дар мактаби миёнаи №92 (ҳоло №51)-и ноҳияи Рӯдакӣ идомаи фаъолият бинмудааст.
Солҳои 2000-2001 дар ҳафтаномаи «Оила», баъдан боз дар мактаб кор кардааст. Аз соли 2011 то ҳол муҳаррири шуъбаи нашрияи Вазорати маориф ва илми Ҷумҳурии Тоҷикистон —«Омӯзгор» мебошад. Муаллифи як силсила мақолаҳои танқидӣ буда, ҳамчунин, ба навиштани қиссаю ҳикоёт машғул аст. Узви Иттифоқи журналистони Тоҷикистон, «Аълочии матбуоти Точикистон» буда, бо ифтихорномаҳои Вазорати маориф ва илми Ҷумҳурии Тоҷикистон , Вазорати фарҳанги ҷумҳурӣ ва Иттифоқи журналистони кишвар мукофотонида шудааст.
Муаллифи се китоб: «Растагорӣ», «Ранҷиш» ва «Дасти боло». Китоби чањоруми нависанда дар дасти чоп аст. Аз соли 2017 узви Иттифоқи нависандагони Тоҷикистон мебошад. Моҳи декабри соли 2018 китоби «Растагорӣ»—и Шодӣ Раҷабзод барандаи Ҷоизаи «Китоби сол» гардид. Ба наздикї китоби ҳикояҳои «Дасти боло»-и адиб сазовори ҷоизаи адабии Иттифоқи нависандагони Тоҷикисотон ба номи Садриддин Айнӣ гардид.
Оиладор ва соҳиби 8 фарзанд.
Ҳотами ҲОМИД
Муҳаррири шуъбаи муасисаҳои таҳсилоти ибтидоӣ ва миёнаи касбӣ
225-81-55
22- юми январи соли 1966 дар оилаи зиёӣ таваллуд шудааст. Хатмкардаи факултаи филология (гурӯҳи журналистика)-и УДТ ба номи В. И. Ленин (с. 1989, ҳоло ДМТ).
Фаъолияти кориаш ҳанӯз ҳангоми муҳассили соли панҷуми факулта буданаш ҳамчун мудири шуъбаи мактаб ва ҳаёти мактаббачагони газетаи «Пионери Тоҷикистон » (ҳоло «Анбоз») шурӯъ гардидааст.
Солҳои 1990-1995 муаллими забон ва адабиёти тоҷики мактаби миёнаи рақами 49 (ҳоло 52)-и ноҳияи Рӯдакӣ буд. Минбаъд як муддат ба ҳайси наттоқи Радиои Тоҷикистон кор кард. Аз соли 1997 то охири январи соли 2013 мухбири махсуси ҳафтаномаҳои «Минбари халқ», «Чархи гардун», масъули саҳифаҳои тоҷикии ҳафтаномаи бачагонаи «Аладдин» буд. Ҳамзамон, аз соли 2000 то соли 2005-ум дар вазифаи сармуҳаррири ҳафтаномаи «Анӯшервон» фаъолият намудааст.
Навиштаҳояш бештар мавзӯъҳои маориф, фарҳанг, илм, санъат, иҷтимоиётро дар бар гирифтаанд. Ғолиби чандин озмунҳои соҳавӣ буда, дар инъикоси мавзӯъҳои номбаршуда маҳорати касбӣ нишон додааст.
Аз 2-юми феврали соли 2013 муҳаррири шуъбаи мактабҳои таҳсилоти ибтидоӣ ва касбии нашрияи «Омӯзгор»-и Вазорати маориф ва илми Ҷумҳурии Тоҷикистон мебошад.
Нишонҳои «Аълочии маорифи Тоҷикистон » (с. 1997), «Аълочии матбуоти Тоҷикистон » (с. 2000), «Аълочии фарҳанги Тоҷикистон » (с. 2002) – ро дорад. Бо ифтихорномаҳои вазоратҳои маориф, фарҳанг, корҳои дохилии Тоҷикистон , Кумитаи ҳифзи муҳити зисти назди Ҳукумати Ҷумҳурии Тоҷикистон , медалҳои ҷашнии «75 – солагии РБДА ВКД ҶТ», «100 – солагии матбуоти тоҷик» қадрдонӣ шудааст.
Бо Фармони Президенти Ҷумҳурии Тоҷикистон (с. 2011) бо медали «Хизмати шоиста» мукофотонида шудааст. Лауреати мукофоти ИЖ Тоҷикистон ба номи Абулқосим Лоҳутӣ (с. 2017).
Ҳотами Ҳомид узви Иттифоқи журналистони Тоҷикистон (с. 1997), Ассотсиатсияи журналистони риштаи варзиши Тоҷикистон (с. 2007 ) мебошад. ӯ муаллифи чор маҷмӯаи насрист: «Марди нексиришт» (с. 2009, Душанбе), «Набардозмуда» (с. 2010, Москва), «Дасти одам – гул» (с. 2013, Душанбе), «Барги андеша» (с. 2017, Душанбе).
Оиладор, соҳиби чор фарзанд.
Нуъмон РАҶАБЗОД
Мухбири минтақавии нашрияи «Омӯзгор» дар вилояти Суғд
-
Раҷабов Нуъмон Қурбонович (Нуъмон Раҷабзода) 20-уми октябри соли 1971 дар ноҳияи Мастчоҳ таваллуд шудааст. Хатмкардаи мактаби миёнаи №10 ноҳияи Мастчоҳ буда, соли 1989 ба Донишгоҳи давлатии Тоҷикистон ба факултаи филологияи тоҷик дохил гардида, ин даргоҳи маърифатро соли 1994 хатм менамояд.
Баъди хатми донишгоҳ фаъолияти меҳнатиашро ба ҳайси омӯзгор дар мактаби миёнаи №24, ноҳияи Мастчоҳ оғоз менамояд. То соли 2002 ба касби пуршарафи омӯзгорӣ ва таълиму тарбияи насли наврас машғул гардида, баъдан фаъолияти хешро дар соҳаи рӯзноманигорӣ идома медиҳад.
Бо нашрияҳои “Омӯзгор”, “Анвори дониш”, “Суғд”, “Суғдиён”, “Сухани халқ”, “Тирози ҷаҳон” ва дигар васоити ахбори умум ҳамкории судмандро ба роҳ монда, мақолаҳояш пайваста ба нашр мерасанд. Намояндаи ҳафтаномаи “Омӯзгор” дар вилояти Суғд буда, аъзои Иттифоқи рӯзноманигорони Тоҷикистон, Аълочии матбуоти Тоҷикистон ва барандаи ҷоизаи Созмони вилоятии Иттифоқи рӯзноманигорон ба номи Ҳоҷӣ Содиқ мебошад.
Оиладор, соҳиби чаҳор фарзанд.
Ҷангибек Улфатшоев
Мухбири минтақавии нашрияи «Омӯзгор» дар Вилояти Мухтори Кӯҳистони Бадахшон
-
Улфатшоев Ҷангибек 10 январи соли 1964 дар деҳаи Тусиёни ҷамоати деҳоти Тусиёни ноҳияи Шуғнон (ҳоло ноҳияи Роштқалъа) ба дунё омадааст. Мактаби миёнаро соли 1981 хатм карда, худи ҳамон сол ба факултаи филологияи Донишкадаи омӯзгории шаҳри Душанбе ба номи С. Айнӣ дохил шудааст.
Пас аз анҷоми таҳсил ба фаъолияти омӯзгорӣ пардохтааст, собиқаи фаъолияти омӯзгориаш 16 сол мебошад. Соли 2000 – ум чун мушовир ба филиали Инcтитути такмили ихтисоси муаллимони вилоят ба кор гузаштааст. Соли 2002 барои идомаи фаъолият ба раёсати маорифи вилоят даъват мегардад. Соли 2011 аввал дар шуъбаи ташкилӣ, баъдан дар бахши итилоотию таҳлилии дастгоҳи раиси ВМКБ кор мекунад. Соли 2020 бо пешниҳоди раиси вилоят муовини сардори раёсати маорифи вилоят таъин гаштааст.
Аз моҳи феврали соли 2022 дар нашрияи вилоятии “Бадахшон” чун рӯзноманигор фаъолият дорад. Аз феврали соли 2023 дар асоси шартнома чун мухбири минтақавӣ бо ҳафтаномаи “Омӯзгор” ҳамкорӣ мекунад. Аз соли 1985 чун журналист фаъолият намуда, айни замон маҳораташро дар наср меозмояд. Ба ду забон – тоҷикӣ ва русӣ эҷод мекунад.
Узви Иттифоқи журналистони Тоҷикистон ва Конфедератсияи байналхалқии иттифоқҳои журналистӣ аз соли 2007, аз соли 2017 узви ИН Тоҷикистон. Намунаҳои эҷодаш дар ду китоби дастҷамъӣ — «Тазкираи адибони Бадахшон» (соли 2005) ва «Навои дил» (соли 2010) ба табъ расидаанд.
Муаллифи маҷмуаҳои «Пайк» («Логос», 2010), «Гирудори зиндагӣ» («Ирфон», 2017), «Сиришт» («Ирфон», 2017). Дар ҳаҷми 13 саҳифа намунаҳои эҷодаш ба забони русӣ дар маҷмӯаи дастҷамъии «Алманах» (Москва, 2018) нашр гардидаанд. Дар сомонаи “Проза.ру”зиёда аз 15 ҳазор хонанда дорад.
Мукофот: Ифтихорномаи раиси ВМКБ (2002, 2017, 2023), Ифтихорномаи Вазорати маориф ва илми Ҷумҳурии Тоҷикистон (2008), Аълочии маорифи Ҷумҳурии Тоҷикистон (соли 2021), ҷоизадори озмуни «Беҳтарин ҳикояи наврӯзӣ» — ҷойи дуюм, ифтихорнома ва мукофотпулӣ (нашрияи «Омӯзгор», 2017).
Ҷоизадори озмуни «Нависандаи сол – 2017» дар номинатсияи “Дебют” (диплом ва китоби “Алманах”, тариқи сомона – портали Иттифоқи нависандагони Федератсияи Русия «Проза.ру»), номинанти ҷоизаи «Нависандаи сол – 2018» (бо пешниҳоди ҳайати таҳририяи ҳамин сомона), номинанти ҷоизаи «Нависандаи сол – 2019» (бо пешниҳоди ҳайати таҳририяи ҳамин сомона) дар Федератсияи Русия.
Шариф АБДУЛҲАМИДОВ
Мухбири минтақавии нашрияи «Омӯзгор» дар минтақаи Кӯлоби вилояти Хатлон
-
Суҳроб АЗИЗОВ
Мухбири минтақавии нашрияи «Омӯзгор» дар минтақаи Бохтари вилояти Хатлон
-